Skip to main content

ОХУ-ын ерөнхийлөгч Владимир Путин Хойд Солонгост айлчилж байгаа тухай Оросын мэдээллийн агентлагууд мэдээллэв. АНУтай ширүүн сөргөлдөөнтэй байгаа энэ үед АНУ тэргүүтэй Европын орнуудын хориг арга хэмжээг даван туулахын тулд хоёр улс нягт хамтран ажиллах хүсэлтэй байгаагаа уулзалтын үеэр илэрхийлсэн талаар  мэдээллэв.

Путиныг Пхеньяны нисэх онгоцны буудалд Хойд Солонгосын удирдагч Ким Чен Ун угтаж авсан тухай РИА-Новости, Интерфакс агентлаг мэдээлэв. 24 жилийн дараа Хойд Солонгост анхны айлчлалаа хийж буй Путин Украинд явуулж буй цэргийн ажиллагааг нь Хойд Солонгос тууштай дэмжиж байгаад талархаж байгаагаа төрийн хэвлэлд өгсөн тайлбартаа дурджээ.

Хойд Солонгосын нийслэл Пхеньян хотын гудамжуудыг Путины хөрөг болон Оросын төрийн далбаагаар чимэглэжээ. Барилга байгууламжууд дээр “ОХУ-ын Ерөнхийлөгчийг бид халуун дотноор угтан авч байна” гэж бичжээ.

БНАСАУ цөмийн зэвсэг болон пуужингийн хөтөлбөрийнхөө улмаас НҮБ-ын Аюулгүйн Зөвлөлийн эдийн засгийн хүнд хориг арга хэмжээнд орсон байгаа бол Орос улс АНУ болон барууны орнуудын хориг арга хэмжээнд орсон байгаа билээ.  

Мөн уулзалтын үеэр хоёр улс аялал жуулчлал, соёл, боловсролын салбарт хамтын ажиллагаагаа өргөжүүлнэ гэж Путин хэллээ.

Путиныг Шадар сайд Денис Мантруров, Батлан ​​хамгаалахын сайд Андрей Белоусов, Гадаад хэргийн сайд Сергей Лавров зэрэг хэд хэдэн дээд албан тушаалтнууд дагалдан яваа гэж түүний гадаад бодлогын зөвлөх Юрий Ушаков мэдэгдэв. Айлчлалын үеэр иж бүрэн стратегийн түншлэлийн хэлэлцээр зэрэг олон баримт бичигт гарын үсэг зурахаар төлөвлөгджээ.

АНУ болон Өмнөд Солонгосын албаныхан Хойд Солонгосыг Оросд их буу, пуужин болон бусад цэргийн техник хэрэгслээр дэмжлэг үзүүлж магадгүй гэж үзэж байна.

 

Эх сурвалж: http://9news.au

 

    YourFinServices Web System v2.1